Federal Finance Minister Miftah Ismail has resigned from his post

 وفاقی وزیر خزانہ مفتاح اسماعیل اپنے عہدے سے مستعفی  

وفاقی وزیر خزانہ مفتاح اسماعیل نے عہدے سے استعفیٰ دیدیا، مفتاح اسماعیل نے اپنے استعفیٰ پارٹی قائد میاں نواز شریف کو پیش کیا۔

تفصیلات کے مطابق مسلم لیگ (ن) کے قائد میاں نوازشریف کی زیرصدارت لندن میں اہم پارٹی اجلاس ہوا،اجلاس میں ملک کی مجموعی سیاسی وقومی صورتحال پر تفصیلی غور کیاگیا ،وزیراعظم شہبازشریف، اسحاق ڈار، مریم اورنگزیب، مفتاح اسماعیل، ملک محمد احمدخان اور احد چیمہ نے اجلاس میں شرکت کی۔

قائد نواز شریف اور وزیر اعظم شہباز شریف نے سینیٹر اسحاق ڈار کو وزیر خزانہ کیلئے نامزد کر دیا ۔اس موقع پرمفتاح اسماعیل نے اپنا استعفیٰ قائد میاں نوازشریف کو پیش کردیا، ان کا کہناتھا کہ وزارت آپ کی امانت تھی، آپ نے ہی وزیر بنایا تھا، چار ماہ میں اپنی بھرپور صلاحیت سے کام کیا، پارٹی اور ملک سے وفاداری نبھائی۔

قائد میاں نوازشریف نے مشکل ترین حالات میں ذمہ داریاں نبھانے پر مفتاح اسماعیل کی کوششوں کو سراہا ،لیگی رہنماﺅں کا کہناتھا کہ سابق حکومت کی لگائی معاشی تباہی کی آگ موجودہ حکومت کوبجھانا پڑی۔

اجلاس کا مؤقف تھاکہ سابق حکومت کی لگائی معاشی تباہی کی آگ موجودہ حکومت کوبجھانا پڑی۔ذرائع کے مطابق مفتاح اسماعیل نےکہا پیرکو پاکستان پہنچ کر وزیر خزانہ کے عہدے سے استعفیٰ دے دوں گا۔خیال رہے کہ اس سے قبل لندن میں وزیراعظم شہباز شریف اور ن لیگ کے قائد نواز شریف کی سلیمان شہبازکی رہائش گاہ پر ملاقات ہوئی جس میں ملکی سیاسی صورتحال پر مشاورت کی گئی۔دو دن کی طویل مشاورت کے بعد فیصلہ ہوا ہے کہ اسحاق ڈار وزیراعظم شہبازشریف کےساتھ ہی پاکستان روانہ ہوں گے۔

اسحاق ڈارمنگل کو بطور وزیر خزانہ حلف اٹھائیں گے۔